സാഹചര്യം

ആകാശം തൊടാന്‍
മലകയറിപ്പോയ കാറ്റ്
തിരികെ വന്നില്ല
കടല്‍ കാണാന്‍ പോയ പുഴയും

മരുമണ്ണില്‍ വിളഞ്ഞ രാപ്പകലിനു
വേവ് കൂടിയതിനാല്‍
ചുള്ളികമ്പുകള്‍ മുഴുവന്‍
എരിഞ്ഞ് തീരുന്നു

വഴി മറന്നിട്ടല്ല
മറ്റൊരു വഴി കാണാത്തത് കൊണ്ടാണ്
തടവറ ചാടാത്തത്

പുസ്തകം

അടിവരയിട്ടു
അടയാളപെടുത്താതെപോയ
അനുഭവങ്ങളെല്ലാം
അലസം മറിച്ചുപോയ
താളുകളിലായിരുന്നു
പുനർ‍വായനയില്ലാതെ
അടച്ചു വെച്ച
പുസ്തകത്തിൽ ‍

തിരുത്താൻ  മടിക്കുന്ന
അക്ഷര തെറ്റുകളും
അലങ്കാര പദങ്ങളും
പുഴുക്കളായ് തിന്നുമുടിക്കുന്ന
പുസ്തകം
ഉള്ളടക്കങ്ങൾ
പഠിക്കാത്ത

വായിക്കപ്പെടാതെ പോകുന്ന
വരികളും വരകളും
തെളിയാത്ത വിളക്കുമരംപോലെ
ദിക്ക് തെറ്റിക്കുന്നു

ദേശാടനക്കാരുടെ യാത്ര
ദിശ മാറി ദുരിതത്തിലൊടുങ്ങുന്നു

കൂട്ടം തെറ്റി മേയുന്നോരും
സ്നേഹകുരുക്കിൽ‍ പെടുന്നോരും
സ്വാതന്ത്ര്യത്തിൻറെ ദുസ്വാദ്
അനുഭവിച്ചറിയുമ്പോള്‍
കലവും പാത്രവും
കഴുകി കമിഴ്ത്തിയുട്ടുണ്ടാകും

പ്രണയം

ബോധ നിലങ്ങളിൽ ‍
പുലരിത്തുടിപ്പ് പോൽ ‍
നിദ്രാവനങ്ങളിൽ ‍
നിലാപ്പൂവുപോൽ ‍
രാവിന്‍റെ വിമൂകതയിൽ ‍
ഒറ്റക്കിളി പാട്ടുപോൽ ‍
നിനവിന്‍റെ തീരത്ത്
ഈറൻ ‍ കാറ്റുപോൽ ‍
ഒഴുകി പരന്ന് നിറയുന്നു
ഇഷ്ടങ്ങളിൽ ‍ ഇണകളിൽ ‍

അകലങ്ങളിൽ ‍
വേവലാതിയുടെ വേനൽ ‍
അരികിൽ ‍
പൊഴിയും ആലിപ്പഴം

പ്രളയമാകാതെ വറ്റിയാൽ ‍
വരണ്ടു മരുഭൂമിയാകും

മനസ്സിലെ മരീചികകള്‍
മൗന നൊമ്പരത്തിന്റെ
മണൽ‍ക്കാടുകൾ ‍

ഭീരു

കടലുണ്ടെന്നുള്ളിൽ  ‍
തിരകളില്ലാതെ
തീരമുണ്ടെന്നിൽ  ‍
പുഴയില്ലാതെ

അഗ്നിയുണ്ടെൻ നെഞ്ചിൽ ‍
ആളിപ്പടരാതെ
ആകാശമുണ്ടതിൽ
മഴമേഘങ്ങളില്ലാതെ

വേനൽ പുതപ്പിൽ ‍
പൊള്ളുന്ന ഭൂമിപോൽ ‍
ചുട്ടുപഴുത്തെരെൻ ‍ മൗനം
അതിതാപ മർദ്ധത്തിൽ ‍
പൊട്ടിച്ചിതറുമ്പോൾ ‍
ഏതെങ്കിലുമൊരു  ചീളിൽ
കാലം കോറിയിട്ടുണ്ടാകും
എന്‍റെ പേര്, ഭീരു